ಬೆಂಗಳೂರು: ಕಳಪೆ ಹೆಲ್ಮೆಟ್ ಧರಿಸಿದ್ದ ಬೈಕ್ ಸವಾರನಿಂದ ಪೊಲೀಸ್ ಪೇದೆಯೊಬ್ಬರು 100 ರೂಪಾಯಿ ದಂಡ ಪಡೆದು ನಂತರ ಅದನ್ನು ವಾಪಸ್ ಕೊಟ್ಟಿದ್ದಾರೆ. ದಂಡ ಪಡೆಯುವ ಅಧಿಕಾರವಿಲ್ಲದಿದ್ದರೂ ಪಡೆದದಕ್ಕೆ ಅವರನ್ನು ಸೇವೆಯಿಂದ ಅಮಾನತು ಮಾಡಲಾಗಿದೆ.
ಎಚ್ಎಎಲ್ ಸಂಚಾರ ಠಾಣೆ ಕಾನ್ ಸ್ಟೇಬಲ್ ಪವನ್ ದ್ಯಾಮಣ್ಣನವರ್ ಅಮಾನತಿಗೆ ಒಳಗಾದ ಪೊಲೀಸ್.
ವಾಹನ ಸವಾರ ಕಳಪೆ ಹೆಲ್ಮೆಟ್ ಧರಿಸಿದ್ದಾರೆಂದು ಅವರಿಂದ 100 ರೂಪಾಯಿ ದಂಡ ಪಡೆದಿದ್ದರು. ಬೈಕ್ ಸವಾರ ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ ಕಾರಣ ದಂಡವನ್ನು ಪೇದೆ ವಾಪಸ್ ಕೊಟ್ಟಿದ್ದಾರೆ. ಆ ದೃಶ್ಯದ ವಿಡಿಯೋ ಇದೀಗ ಜಾಲತಾಣದಲ್ಲಿ ವೈರಲ್ ಆಗಿದೆ.
ವಾಹನ ಸವಾರರಿಗೆ ಸ್ಥಳದಲ್ಲಿ ದಂಡ ವಿಧಿಸುವ ಅಧಿಕಾರ ಎಎಸ್ಐ ಮತ್ತು ಮೇಲ್ದರ್ಜೆ ಅಧಿಕಾರಿಗಳಿಗೆ ಮಾತ್ರ ನೀಡಲಾಗಿದೆ. ಆದರೆ ಕಾನ್ ಸ್ಟೇಬಲ್ ಮತ್ತು ಹೆಡ್ ಕಾನ್ ಸ್ಟೇಬಲ್ ಗಳಿಗೆ ಈ ಅಧಿಕಾರ ಇರುವುದಿಲ್ಲ. ಇದನ್ನು ಉಲಂಘಿಸಿ ಕಾನ್ಸ್ಟೇಬಲ್ ದಂಡ ಪಡೆದಿದ್ದರು.
ಬೆಂಗಳೂರಿನಲ್ಲಿ ಆಯ್ ಎಸ್ ಆಯ್ ಮಾರ್ಕ್ ನ ಹೆಲ್ಮೆಟ್ ದರಿಸುವ ಅಭಿಯಾನ ಪ್ರಾರಂಭವಾಗಿದು ಇನ್ನು 15 ದಿನ ಜಾಗೃತಿ ಅಭಿಯಾನ ನಡೆಸಲಾಗುತ್ತಿದೆ. ಅಲ್ಲಿಯವರೆಗೆ ಸವಾರರಿಗೆ ದಂಡ ವಿಧಿಸದಂತೆ ಆದೇಶ ನೀಡಲಾಗಿದೆ. ಆದರೆ ಈ ಕಾನ್ ಸ್ಟೇಬಲ್ ತಪ್ಪು ಮಾಡಿರುವುದು ಕಂಡುಬಂದಿದೆ ಎಂದು ಜಂಟಿ ಪೊಲೀಸ್ ಆಯುಕ್ತ (ಸಂಚಾರ) ಡಾ.ಬಿ.ಆರ್. ರವಿಕಾಂತೇಗೌಡ ತಿಳಿಸಿದ್ದಾರೆ.
