बेळगावातील ज्येष्ठ स्वातंत्र्यसैनिक, महाराष्ट्र एकीकरण समितीचे लढवय्ये नेते, नामवंत वकील, समाजवादी कार्यकर्ते व बेळगाव शाखा अंधश्रद्धा निर्मूलन समितीचे अध्यक्ष अॅड. राम आपटे यांचे शुक्रवार दिनांक २३ डिसेंबर २०२२ रोजी पहाटे वृद्धापकाळाने वयाच्या ९७ व्या वर्षी निधन झाले. सीमा चळवळीतील एक अग्रणी लढवय्या, सच्चा कार्यकर्ता हरपला आहे.
राम आपटे हे नेहमीच कामगारांचे प्रश्न सोडविण्यासाठी अखंड लढत राहिले, ज्यामुळे ते एक कामगार नेते म्हणून परिचित होते. अॅड राम आपटे यांनी जीवन विवेक प्रतिष्ठान या सामाजिक विश्वस्त संस्थेची स्थापना केली. अन्याय निवारण मंच, भ्रष्टाचार निर्मूलन समिती, शोषण मुक्तीदल अशा बेळगावातील सामाजिक संस्थांचे ते संस्थापक व आधारस्तंभ होते.
बेळगाव परिसरातील सर्व शैक्षणिक, सामाजिक संस्था व सर्व पक्षीय आदरांजली सभा मंगळवार दिनांक २७ डिसेंबर २०२२ रोजी सायंकाळी ४:३० वाजता मराठी विद्यानिकेतन, ज्योती कॉलेज कंम्पाऊंड, कॅम्प, बेळगाव च्या प्रांगणात आयोजित केली आहे.
ही आदरांजली सभा ॲड. राजाभाऊ पाटील यांच्या अध्यक्षतेखाली आयोजित करण्यात आली आहे. तरी बेळगाव परिसरातील सर्व सामाजिक कार्यकर्त्यांनी उपस्थित रहावे, असे मराठी विद्यानिकेतन शाळा सुधारणा समितीचे अध्यक्ष श्री सुभाष ओऊळकर यांनी कळविले आहे
